自從內地科學家成功改造胚胎基因，仲要第二日就嚟埋香港做公開發表單嘢一出，成個「面書」好快就湧現出兩張動漫圖。較早出現嘅係《鋼之煉金術師》中，被老竇改造成合成獸嘅細路女妮娜，甚至《１００毛》都係用人造人個概念嚟抽水。不過，《鋼煉》再出名都好，張圖出現嘅頻率好快就被另一張追過。佢就係《機動戰士特種計劃》入面嘅拉．魯．古魯謝。大概幫佢配音嘅關俊彥，以至福田同水島兩公婆都無諗過，俾人鬧咗Ｎ世之後，突然會得到咁多認同，甚至喺某個層面上超越公認神作嘅《鋼煉》——神作當然係指《ＦＡ》個版本，而唔係一樣由水島搞出嚟，又係一鑊泡嘅零三年版。
好老實講，理科白癡一個，對賀教授成個研究嘅技術細節認識唔多，所以就算只係吹吓水，都唔敢亂掂大多科學方面嘅問題。想講多幾句嘅係，既然咁人貼呢個面具佬出嚟，就不妨用《ＧＳ》呢套作品做個例子，睇吓人文角度佢係點樣思考基因改造嘅議題。不過，正式入題之前，或者應該先簡單疏理一下《高達》，特別係平成年代嘅主要出品，背後嘅創作理念係點發展。否則，可能會比較難睇出《ＧＳ》嘅構思有咩討論性。
入咗平成年代之後，《高達》系列開始擺脫「宇宙紀元」的束縛，打算從零開始重新創作新嘅故事系列，從打吸納新一批觀眾，開拓更大嘅市場。就商業角度嚟講，呢個決定肯定係成功嘅。擲界嘅《倒Ａ》姑且唔提，號稱「平成三部曲」嘅《Ｇ》、《Ｗ》同《Ｘ》無疑深入民心，呢三套由九四年到九八年（唔計《Ｗ》外傳嘅話就只係到九六年底）嘅作品，一方面各自表現出強烈嘅個人風格，例如《Ｇ》嘅香港砲影風同《Ｗ》嘅美男偶象風，另一方面卻又有好顯嘅共通點：亂世童話。《Ｇ》講述地球受到嚴重污染，難以復甦，而人類仲只係識得不斷爭奪權力，主角杜門就係喺咁醜陋嘅鬥爭中同莉瑛孕出真愛，最後更化身白馬王子，同洗牌同盟嘅同伴合力創造尚有生機嘅未來；《Ｗ》嘅莉莉娜希望喺戰亂嘅世界中終結一切戰爭，而包括主角希羅在內嘅五位少年負責擔當守護公主嘅騎士，尤其結局時一句「世上再沒有高達」，同「佢地從此幸福快地地生活下去」一樣，更突顯出童話味道；至於《Ｘ》更加直接走末世風，各方係戰後嘅世界爭奪前一世代嘅戰鬥機械，男主角卡洛意外捲入事件，成為保護少女蒂花嘅騎士，後面蒂花要去到月球解開「新人類」秘密嘅情節更加《輝夜姬》一樣。
好多評論都認為，呢個共通點並唔係偶然，而係社會風氣驅使下嘅結果。無錯，呢度所指嘅就係九十年代初嘅日本泡沫經濟爆破。三部作品描繪嘅世界舞台，就同嗰個時候嘅社會環境一樣，即係混亂、破滅，同有待復甦。它們不約而同咁分析出，故事中嘅亂象不單係源自人類嘅慾望，更指出呢種慾望係周而復始，無所止盡嘅。這點令到東方不敗絕望，又令娜娜莉決心尋求根絕一切問題嘅方法。佢哋最後成功咗幾多？《Ｗ》嘅外傳作品《無盡的華爾茲》就係要話俾大家知，原來「世上再沒有高達」之後，士兵無飯開，到最後都係想打番仗。作品反映出一個時代嘅思考，亦嘗試向呢啲思考給予一種解答。就係呢三套作品奠下嘅基礎，注定平成時代的《高達》系列具有高度嘅社會意識同人文色彩，唔可能同其他王道機械人作品相題並論。
喺《Ｘ》之後，下一部電視作品就係踏入咗千禧年嘅《ＧＳ》。由呢個時期開始，作品嘅時事性更高，不再局限於時代氛圍嘅渲染。就好似《００》講能源戰爭、全球化同埋中東「火藥庫地區」嘅戰亂；《鐵血的孤兒》則係關注難民、貧窮、少年兵、階級社會等等。而《ＡＧＥ》……算吧，就算唔計佢差到不得了嘅製作，單係構思上面，日野晃博根本缺乏呢種眼光，致使作品冠上「高達」名銜嘅同時，亦沾上無從洗脫嘅原罪。剩係講前兩部，已經睇製作人嘅目光已經由日本社會擴展到全世界，而且裡面嘅問題可以話係現時最切身，亦係至今依然無法解決，甚至只有繼續惡化落去。坦白講，喺流行文化裡面嘗試關注呢類議題，並且俾出一啲剖析，已經係好難得。
如是者，我地入到戲肉，即係《ＧＳ》嘅問題。佢又係要回應啲咩？根據福田嘅講法，誘發佢創作嘅第一因係零一年嘅「美國九一一襲擊」，亦即係故事中「血色情人節」嘅原型。另一個意念雖然佢無直講，但好明顯就係「複製羊」多莉同試管嬰兒嘅出現。呢兩件事肯定係人類現代社會嘅轉捩點，亦對無數作品，包括嚴肅同流行兩類，構成極大的影響——「九一一」令生活喺一線地區嘅我哋突然意識到世界從來無和平，全人類之間嘅不平等足以分裂全世界，甚至到咗要透過自我犧牲嚟報復所謂「上等人」嘅地步。「虛偽的和平」、「憤怒的目光」既係兩輯嘅首集標題，亦係我哋面對嘅真實世界觀；至於「複製羊」，就令我哋開始思考人類係咪獲得咗神嘅權柄，同科學究竟令人類變得有幾自大同愚蠢。隻羊入咗故事之後，就變成咗古魯謝。
古魯謝作為一個複製人，佢嘅誕生自亞爾．布拉加嘅自戀同狂妄。因為技術唔夠成熟，結果一出身就要面對急速老化嘅問題。佢先天而來嘅痛苦換嚟啲咩？竟然係失望、指責同拋棄，仲有永遠同「真正嘅人類」相差一步嘅怪物身分。由呢一刻佢就開始質問自己點解有咁嘅命運。人類嘅不幸或者可以視為因果報應，但佢咩都無做過就要受苦。當然世上都有好多一出生就要面對不幸，於是佢哋就推說前世作孽。但作為被創造出嚟嘅生命，佢究竟有無前世？甚至要問，佢究竟係唔係神同世界所定義嘅生命？比起任何一個人類個體，古魯謝知道更應該恨嘅係呢個俾唔到答案佢嘅世界。世界同佢，彼此都不承認，所有必須要消滅其中一方……故事中，響博士創造咗古魯謝，又成就咗親生仔基拉．大和；噚日，賀教授毫不畏言，如果佢有細路，都一定會將基因編輯技術用喺佢身上。
三色台將「コーディネイター」譯成「新人類」，顯然係唔睇設定又唔識英文。一般較正常嘅翻譯係「調整者」。自問從來唔吹毛求疵，但咁譯其實會扭曲晒成個故事嘅價值批判，因為按照設定，「調整者」只係人類對進化成真正「新人類」嘅一種嘗試。咁「新人類」其實係咩？唔長篇大論，但從出自《Ｘ》同「宇宙紀元」系列，尤其係《ＵＣ》最終章嘅描述，《高達》系列主張嘅「新人類」係一種超出科學範疇，上及精神、靈魂同宇宙層面嘅進化，科學嘅手段永遠只能夠無限接近，但達唔到真正嘅終點——呢種無力嘅模仿就係「調整者」。「新人類」嘅存在被當為宗教一般，係解決人世間所有困厄嘅門徑；「調整者」就只係一種實驗上聲稱嘅進步，人力成果自然會帶來人為問題，就係更多歧視、不滿和不公。《ＧＳＤ》裡面，戴蘭達由遺傳學轉投政治，其實係相當合理：改一個人嘅基因引發咗問題，就提升至改全人類嘅「基因」，再有問題就去改全世界嘅「基因」，改到得為止——如果真係做得到嘅話。
部分網上言論指出，如果真係解決到愛滋病嘅威脅，賀教授其實無問題。但首先，咁樣係咪真係「解決」緊問題先？人類基因並唔係汽車零件，換咗之後會有咩影響？後遺症仲濕滯過「可能患上愛滋病」嘅話點算。唔好唔記係作品裡面，「調整者」雖然個個出類拔萃，但係受精率低，疾病亦都變得相當奇怪。而且，所謂「調整」都唔一定百分百準確啊，就係眼睛隻色唔及預期，都會被當係一件次貨，完美社會中嗰種歧視，絕不下於自然人所面對嘅苦況。到最後，自然人不幸之餘，「調整者」一樣咁大鑊。大家咁痛苦，無嘢解決到，咪打番場世界大戰，打都死晒為止囉。啊，賀教授已經提過其中一個女童己有「基因脫靶」嘅情況……不過睇佢係台上嘅表現，大概同亞斯蘭個老逗一樣，一句就解決晒問題：「科學日新月異，無嘢解決唔到，依家未得啫。」
單新聞一出，世界各地嘅科學家好快出咗一份聯署聲明，內面提到「潘多拉盒子」嘅比喻。比喻唔新，好易明，只係進一步諗起《ＧＳＤ》嘅情節：當議長宣佈「命運計劃」之後，基拉佢哋問過計劃裡面最大權力係邊個，然後就得出「基因成為咗神」嘅結論。好似有趣，但諗落一啲都唔過癮嘅係，呢個「神」由「人」創造，日後又創造番「人」。特別篇《ＦＩＮＡＬ—ＰＬＵＳ》裡面，尼爾喺開場嘅時候讀咗一段《聖經．創世記》，講古蛇如何誘人類祖先食分辨善惡樹上嘅果子，令人從此蒙上原罪，諷刺意味相當深。罪在何人？基因工程師、自然人、調整者、失敗品、複製人，定係「人」呢樣嘢本來就係「罪」嘅代名詞。科學有佢內部嘅範疇，但佢嘅外部從來都牽連好多嘢，社會學、人文學，甚至係神學。呢啲唔單止係科學家以至人類應該要知，而係必須要知——當然，依定知可能已大太遲。點算？有人話，米已成炊，對女嬰出咗世無得拗架啦，所以跟住應該好醒甩好合理咁俾佢哋貢獻人類科學史。嘩，真聽落都覺得又高尚又偉大，好似馬上有得進化咁款。
面對動漫、遊戲作品嘅時候，成日會出現一種矛盾，一方面覺得啲內容好虛幻離地，啲中二到不堪嘅處境根本唔會發生，但另一方面，一覺醒來，原來所有嘢都已經變成咗現實，而唯一仲未發生，甚至不會發生嘅，就只係嗰個大團圓結局。唔覺咩？一個颱風山竹，話俾我哋知《絕體絕命都市》絕對唔係開玩笑；人造器官、人工智能早就有，《千年女王》同《數碼暴龍》又有幾遠？而今次基因改造嬰兒事件，我哋睇到嘅唔單止係古魯謝，更加係佢後面場調整者、自然人之間嘅鬥爭。人類從來都無平等過，金錢、出身等等嘅區分已經係無數人難以跨越嘅藩籬，依家再加基因呢一重，就更加將階級變成絕對。基因係出生之後似乎點樣都逆轉唔到，唔駛等議長力推，「命運計劃」點都會成真。以前成日話《ＧＳ》系列啲對白故弄玄虛不知所云，但當有一日，突然明晒古魯謝啲對白，可能先係最得人驚……另一方面，我哋肯定做唔到基拉同亞斯蘭，最要擔心嘅就係成為真．飛鳥啫。唔好理佢後來點樣變成「路人真」，喺《高達》史上佢嘅角色設計絕對係破天荒——佢係歷代主角中，極少數出身係與戰爭毫無關係，完完全全嘅一個平民。世界確實係好無理咁奪去佢所有嘢，明明生不在戰爭，但死就好可能係戰場。條友中二就梗，但佢亦係位置同我哋最近嘅人。
黑格爾講過，歷史俾我哋嘅教訓係，人類從來唔識汲取歷史教訓。依家落力出文教訓賀教授又好，好似呢篇抽水食花生又好，到咗最後大概都係無咩意義。基因編輯咁尖端咁勁揪嘅技術，邊個國定會忍得住手。人唔墮落唔安樂嘛。所以最後想感歎嘅只係，當《ＧＳＤ》呢啲咁唔掂嘅爛片都有警世意味時，呢個世界係咪更加唔掂呢？
