注意：內容涉及劇透，風險自行評估。
事先諗住睇完就算，但出咗紅館之後，就有種想寫底番啲嘢嘅感覺，而且應該要用港式嘅廣東話去寫。就同子華神今次只設香港場一樣，如果睇唔明啲廣東話用語，大概真係唔駛再理呢篇好廢嘅文——同時真心恭喜你，你唔需要係香港呢氹混水裡面浮沉。
難得有機會買到飛去現場睇，所以對日期無咩揀擇，隨隨便便咁決定，結果買咗都算幾開頭嘅場次。好記得明明天朗氣清咗大半日，但臨出門口望吓室外，先發覺唔知幾時開始橫風橫雨。好彩一路去到火車站都唔駛淋，而上紅館時更加停埋雨，剩係撻地有少少濕。清清涼涼，陰陰沉沉，可能就係天公要為大家準備最恰當嘅情調。我會話，成場真係「哭笑都得」。笑，係因為我笑點唔算太高，加埋現場氣氛，所以由頭都尾都可以好開懷咁笑；但係出嚟一路回味嗰兩個鐘時，又唔知點解有種想喊又未喊得出嘅感覺。
比起近年透過影碟睇到嘅棟篤笑，子華神今次嘅鋪排幾環環相扣，有種好想傳達某啲訊息出去嘅感覺。簡單咁講，中途殺出「面斥不雅」四隻大字，可能就係關鍵所在。正如佢所講，「面斥不雅」就係話有啲兜口兜面講就好不雅，大家都係國際大都會嘅斯文人，唔駛出口話都應該自己識收斂啦。用古人嘅角度，就係人當知恥，對自己有要求，有羞恥心，有好多嘢就唔會敢做出嚟。聽過佔中嗰年場棟篤笑嘅，都大概知道子華神嘅立場，但今次，佢似乎想放「地圖砲」多過歸邊。恐怕入得場嘅，包括我自己，都好可能遇到中箭位，差在多與少啫。如果真係要定義一個立場，咁只可以話係佢企係「香港」嗰一邊。
今時今日，好多人都唔再理會咩「面斥不雅」。要靠「行前一小步，文明一大步」嗰啲就不再話下。真正得人驚嘅係好多自我感覺良好，又真係唔怕面對全社會嘅人。明明中央政府早就決定好點「利用」、「打算」香港，所以先有過去幾十年嘅中港狀況，但係九七之後，依然會有人出嚟話自己係個「特工」，自己一直有份幫中央「保衛」香港。打開電視，睇吓史書，都知九七人係上位嘅係嗰班人，九七後咪又係佢地。九七前，怕且英國政治部都睇唔出佢哋個乞嚏原來係特工作戰。最重要嘅係，原來佢哋當時啲成就同幸福，原來背來都好委屈，忍受住全民族嘅國恥咁去嘆；當然，呢啲嘢唔係第一日有人走出嚟鬧，而同一時間，鬧人嗰班又未必好得去邊。因為暗角七警，所以任何警察做咩都係錯，番得工就要帶定家母，哪怕佢哋只係抄緊你嗰架擺明違泊嘅車。點解你有資格要求人哋好脾氣過教宗？有人或者話呢啲叫義，所以某哋人有喪事，講恭喜都好有資於正義。老實講，好認同當時係哲學課上聽到一句，有啲人有啲事的確係唔知點解好難生出同情，但亦唔會覺得要專登花時間播小鳳姐。呢個係尊唔尊重自己嘅問題，好多說話只係為發洩，對香港其實無幫助。依家不論邊派，本住立場，似乎可以無底線，做咩到得，講咩到得。再肉麻再惡毒，明知平日唔可以對身邊人做嘅，通通表露無遺。無底線，今日有時會叫做「真性情」，即係好似孟子口中嘅禽獸。
平時唔敢做，突然會做晒，好多時就係群體嘅力量。前幾日播過，子華神配嘅《優獸大都會》，相信佢好清楚咩叫群體力量。個體強弱唔緊要，只要凝造一種多勢眾嘅感覺，就會充滿力量。呢種力量，用得好會好好，但用晒係啲「不雅」嘅地方，就點「面斥」都唔夠你嚟。子華神講到陳冠希事件，因為嗰時社會上好多人公審佢，所以無人敢講其他角度，亦無人敢問點解整電腦嗰個可以隨便公開人哋嘅私人資料，而到最後佢係咩事都無。大家好怕會被標籤為少數，做到大多數就會好安全好強大。吊詭嘅係，群體感覺唔一定係客觀，事實上今日咩色咩立場，都會自覺係大多數，關鐽係搵番一個啱嘅爐去圍啫。
今日好多人話係「亂世」。都錯唔晒，今日我哋面對好多挑戰，既係嚟自子華神個「阿爺」，亦有部分嚟自我哋自己。好擔心終有一日，講句廣東話都係犯禁，亦好難想像話套戲好睇，就要全家落地獄——王家衛當年做拍嗰個都咪洗死啦。係咪因為王家衛係好好采，生於所謂「黃金年代」？但子華神又話俾我哋聽，原來「黃金年代」嘅人出去食餐飯，都可能遇到黑社會衝入嚟劈友，關事嘅死緊，唔關事嘅都無得食甜品。嗰時係無黃藍之分，但有譚張之分，愛錯偶象唱錯歌詞一樣要俾對家斬死。至於大嗌「關正傑好嘢」嘅少眾口味，更加係俾兩邊一齊打獲。有咩可能，宣傳到咩都係「最正」嘅城市，居然要叫人出街開燈，自己諗辦法防止爆格？至於所謂「搵著數」，甚至係人類食禁果時已經有嘅原罪，邊個話今日先至有「特工」出勤。活地亞倫嘅《情迷午夜巴黎》，正正係講呢種「黃金時代情義結」。大家只知道過去嘅好，完全唔理其實依家都有好多嘢改善咗。依家係「亂世」，以前咪又係「亂世」，不過變態方式唔同咗。上一代停留喺過去嘅風光，新一代埋怨過去太美好，都係搵嚟搞。
跟住去邊度？表演中段，舊音樂錄像片再一次播呢個子華神問過嘅問題。拍條片嘅亞視已經處於「永恆」狀態，但個問題至今都未解決。子華神當初問嘅時候，就好似黃碧雲嘅《失城》所講，本地人答唔到，移民答唔到，英國佬都答唔到。到咗今日，又有邊個答得到？大家都要求他人歸邊，但邊邊都好似跟唔過。對住「阿爺」同佢手下成班「特工」，我哋本身已經無力，而我哋連自己對黑白色嘅區別能力都唔要，事無大少都要搲爛塊面，淨係怕唔跟大多數，又享受做大多數嘅爽快……
唉，總算消化晒。再重申一次，呢篇嘢肯定唔係評論，亦唔算分析，就只係聽完一場棟篤笑之後求其諗到，又唔想轉個頭就丟低嘅牢騷。子華神金盆𠺘口，挪用佢個岳飛嘅比喻嚟講，就係因為香港人用金牌封佢把口。講清楚一啲，呢班「香港人」有老有嫩，有富有貧，有左有右，有你有我。當大家眼中淨係得番仇人同自己人，做到大多數就無問題，再唔記得咩叫做「面斥不雅」，咁樣真係就再無咩可以講落去，亦唔會有咩值得大家去笑。
僅記於我生存係香港嘅呢一日。
